Pinilitmo metten ti ilelennek ti init tapno inka maturog
Nagsapa pay laeng di pay naluto diay kinirog
Ania la unay aya ti ganatem nga agawid
Kamayatna pay laeng agpagnapagna nga agwidwidawid
Nadagsen aya dayta binaklaymo gabat a kayo
Imbabam koma pay laeng tapno sakit ta siket saan a kimmaro
Immangeska koma pay laeng tapno angin nalang-abmo
Naliklikan koma ti pannakabannogmo a napalalo
Inan-usam koma ngamin a sinalingsingan dagita burrarawit
Tapno dika unay nasiitan bayat nga inka inawit
Saanmo koma a kagura no dagiti tudok nasakit
Paset ti mangawayan ti masugatan, makarikna iti saniit.
Ala umunaka ngaruden a mangpanurnor iti destino
Ta ipadpad-engko pay laeng ti dumanon iti ungto
Itugotmo man laengen amin dagiti gargaret iti panagdaliasatmo
Ta awanton ti sarsawirko inton mapanunotko met ti sumaruno.
(Kumander Antokoy)
You must be logged in to post a comment.